Igartubeiti Baserri Museoak, Saint-Laryko Turismo Bulegoak eta Ayerbeko Udalak "Jakintzen Hibridazioa" abiarazi dute, tokiko eragileek eskainitako tailerren zikloa

Igartubeiti Baserri Museoak, Saint-Laryko Turismo Bulegoak eta Ayerbeko Udalak POCTEFA PATRIM 4.0 proiektuaren "Jakintzen Hibridazioa" ekimena jarri dute abian, lanbide tradizionalei eta horiek mundu garaikidean duten iraupenari buruzko hausnarketa- eta ikaskuntza-espazioak sortzea helburu duen tailerren zikloa. Zikloan herritarrei irekitako saioak izango dira, bertako artisau, artista eta nekazariek eskainiko dituztenak, hainbat gairi buruz: saskigintza, zeramika, elikadura, ehun-diseinua, artea, dantza, erlezaintza, bitxigintza eta natura. Gainera, topaketak antolatuko dira, komunitateen etorkizunean balioak, identitateak, memoria eta kultura transmititzeak duen zereginari buruz eztabaidatzeko.

Ziklo honetako lehen tailerra "Jateko aukeratzen dugunaren aztarna" merienda-tertulia izango da, Biziola bertako nekazarien kooperatibarekin batera, martxoaren 28an, ostirala, Igartubeiti Baserri Museoan. Topaketa honetan, parte-hartzaileek tokiko produktuak dastatu ahal izango dituzte eta elikagai-erabakiek ingurumenean, tokiko ekonomian, gizartean eta kulturan duten eraginari buruz hausnartu ahal izango dute.

Izen-emateak zabalik daude:

• Posta: igartubeiti@gipuzkoa.eus
• WhatsApp: 618 00 41 31
• Telefonoa: 943 72 29 78

"Jakintzen hibridazioa" zikloa barne hartzen duen PATRIM 4.0 proiektua, Europar Batasunak % 65ean kofinantzatutako ekimena da, Interreg VI-A Espainia-Frantzia-Andorra (POCTEFA 2021-2027) programaren bidez. Programa horrek Pirinioetako kultura-ondarea sustatzen du, Espainiako eta Frantziako museo, ekomuseo, interpretazio-zentro eta unibertsitateen arteko mugaz gaindiko lankidetzaren bidez. PATRIM 4.0ren ekintza zehatz honetan, Saint-Lary, Ayerbe eta Igartubeitiren arteko lankidetza gauzatzen da, mugaren bi aldeen arteko lotura indartuz.
2025ean zehar, Igartubeitiko lehen hitzordu honen ondoren, jarduera gehiago egingo dira Saint-Laryn, ondoren urrian Ayerbera joateko. Azkenik, Igartubeitin azaroan egingo diren tailerrekin itxiko da programa. Programazio ibiltari honek lurraldeen arteko lankidetza-espiritua eta jakintza tradizionalen transmisioarekiko konpromisoa islatzen ditu.

2025eko programazioa

• "Jateko aukeratzen dugunaren arrastoa" merienda-tertulia: martxoak 28
• "Saskigintza tradizionala" tailerra: apirilaren 12an
• "Latxa artilea" tailerra: azaroaren 15ean

PATRIM 4.0ri buruzko informazio gehiago

PATRIM 4.0 kultura ondarea berritzeko eta sormenez kudeatzeko Pirinioetako sarea Pirinioetako eskualdean kultur ondarea zaintzea eta balioestea sustatzen duen proiektua da. Proiektu honen bidez, ezagutza-trukea indartu eta ondarearen kudeaketa hobetu nahi da mugaz gaindiko lurraldeetan. Sare honetan Aragoi, Katalunia, Hautes-Pyrénées (Frantzia), Nafarroa eta Euskadiko bazkideek parte hartzen dute.

PATRIM 4.0 % 65 Europar Batasunak kofinantzatu du Interreg VI-A Espainia-Frantzia-Andorra (POCTEFA 2021-2027) programaren bidez. POCTEFAren helburua Espainia-Frantzia-Andorra mugaren integrazio ekonomiko eta soziala indartzea da.

PATRIM 4.0ren lankidetza

• Ayerbeko udala
• Ecomuseu de les Valls d'Àneu
• Grauseko udala
• Hoya de Huesca Eskualdea
• Somontano de Barbastroko Eskualdea
• Ribagorzako Eskualdea
• K6 Kultur Kudeaketa SL
• Zugarramurdiko Garapena SL
• Commune de Beaudéan
• Office de Tourisme de Saint-Lary
• Communauté de Communes Neste Barousse
• Universitat de Barcelona
• Universitat Autònoma de Barcelona
• Euskal Herriko Unibertsitatea