Elur motak

Groenlandian, 60tik gora elur jenero bereizten omen dituzte, hemen ez hainbeste baina badira bai:

• Elur bustia, euriarekin nahasian, maluta egin gabe, trinkotu gabe datorrenean. Iparraldean, elur urtua ari duela esaten dute. 
• Elur-euria, beheraka agudo eta xuxen jausten delako, pisutsu, euritsu edo urtua. 
• Elur-gesala, elur-baltsa, elur-kresala uzten du elur-euriak lurrera iristean. 
• Elur bustiarekin ez da elur-maindire edo elur-izararik ezartzen. 
• Elurra elurxeago denean, jardun-ahala, elur-lapar edo elur-nabar gelditzen da, elur-lapatsa, ezartzen hasi ez hasi, laster xurituko lukeena. 
• Elurttiki xume eta xeheari modu askotara deitzen zaio: elur-hautsa, elurxe, elurxehe, elur pikor, pikorta, elurxintxar, elurgillo, elurpirrin, elurtxingo, elur-txipitx, elur-geldo, elur-irin, elur-izpi, elur-gazura, elur-kixika, elur-zirin....
• Elur-gazura, herenegungoa. 
• Elurra gorputz hartuta datorrenean, elur-malko, elur-malo, deitu izan zaio, malo-malo edo mara-mara ari duela adieraziz. Hortik elur-maluta eta elur-mallo edo elur-mulleta ere. 
• Elkarri lapata, pega-pega, multzotuta datorrenean, elur-moltso, elur-hosto, elur zafla, hauek jada puska handiak direnean, mataza baten irudian, hortik elur-matazea deitzearena, batez ere elur-erauntsi formala eta itxia ari duenean. 
• Dena urtzen hasten denean, elur-kresala geldituko da, elurra mehetu eta gesaltzen denean, eta plisti-plasta ibiltzeko tamainako elur-salda bihurtuko da.